A directora xeral de Traballo Autónomo e Economía Social, Marta Vázquez Guzmán, participou esta mañá —na sede do Polo de emprendemento e apoio ao emprego da Fonsagrada— nunha xornada de continuidade do Laboratorio Amas da Terra & Polos de emprendemento. En concreto, o obxectivo é poñer en común ideas, iniciativas e proxectos liderados por mulleres no territorio a través de dinámicas participativas e grupos de traballo.
A directora xeral considerou fundamentais accións coma esta á hora de apostar polo desenvolvemento das contornas rurais en beneficio tanto do crecemento económico como da cidadanía. Nese sentido, puxo en valor o asesoramento gratuíto e personalizado que ofrece o Polo de emprendemento da Fonsagrada e os outros 14 distribuídos por Galicia, cinco deles na provincia de Lugo. En concreto, a maiores do fonsagradino, os de Mondoñedo, Friol, Sarria e Monforte de Lemos.
