José González felicitou a todas e todos os profesionais premiados e tamén ao directivo bancario Pablo Junceda, recoñecido co Premio Unión Profesional de Galicia 2026
O conselleiro de Emprego, Comercio e Emigración, José González, destacou hoxe en Santiago de Compostela o labor dos colexios profesionais como axentes fundamentais no desenvolvemento socioeconómico do país. Fíxoo no marco do acto de entrega dos Premios á Excelencia e Compromiso Profesional 2026, organizado pola Unión Profesional de Galicia.
Alí tamén felicitou a todas as persoas premiadas de colexios profesionais de distintos sectores e tamén ao directivo bancario Pablo Junceda, recoñecido co Premio Unión Profesional de Galicia 2026 pola súa traxectoria e compromiso desde o sector financeiro a prol do desenvolvemento do tecido empresarial galego. Na actualidade, Pablo Junceda é director xeral de Banco Sabadell Gallego e director xeral adxunto de Banco Sabadell e del o conselleiro destacou o seu compromiso e experiencia na xestión bancaria.
Ademais, José González trasladou a aposta da Xunta polo diálogo, a escoita activa e a colaboración público-privada aos que se referiu como alicerces para potenciar o progreso e o crecemento da comunidade galega. Tamén agradeceu o labor da Unión Profesional de Galicia que agrupa a máis de 46 colexios profesionais, o que supón que, á súa vez, representa a máis de 90.000 profesionais de distintas profesións en Galicia.