A directora xeral de Traballo Autónomo e Economía Social, Marta Mariño, participou hoxe na apertura do evento Dinamización do emprendemento hostaleiro a través da formación especializada, organizado desde o Polo de emprendemento e apoio ao emprego de Monforte. Alí, destacou que este centro ten atendido máis de 350 proxectos e promovido a creación dunha ducia de empresas no marco das preto de 1.300 iniciativas asesoradas pola Rede de Polos no conxunto da provincia de Lugo, nun total de cinco oficinas que se sitúan a maiores na Fonsagrada, Friol, Mondoñedo e Sarria.
Así, o equipo técnico do Polo monfortino realizou máis dun milleiro de sesións de titoría coas persoas emprendedoras que acudiron ás instalacións (un 51 % delas, mulleres), destacando cun 20 % os negocios do sector da hostalaría. Cómpre engadir que no evento de hoxe se aborda precisamente o emprendemento no sector hostaleiro, contando con testemuños da contorna tanto do eido emprendedor como do formativo co fin de compartir experiencias e xerar sinerxías.