A delegada territorial de Ferrol, Martina Aneiros visitou esta mañá o estudio de arquitectura VLD Arquitectos, en Ferrol, un dos negocios beneficiarios destas achegas autonómicas
Trátase dunha liña de axudas destinada a impulsar iniciativas de emprendemento de autónomos, mutualistas e pemes
A Xunta ten aberto ata o próximo 2 de marzo o prazo para solicitar as axudas de ata 35.000 euros para emprendemento no traballo autónomo, mutualistas e pemes. Así o lembrou esta mañá a delegada territorial da Xunta en Ferrol, Martina Aneiros, durante unha visita realizada ao estudio de arquitectura VLD Arquitectos, beneficiario destas achegas.
Acompañada da responsable do estudio, Cristina Agulló, Aneiros coñeceu de primeira man o investimento realizada grazas á subvención da Xunta e que permitiu acometer as obras de reforma do novo local deste negocio por importe de máis de 15.000 euros.
“A través desta convocatoria de axudas o Goberno galego concedeu o pasado ano axudas a 28 empresas de Ferrolterra por valor de 250.000 euros, o que reflicte o seu compromiso de seguir impulsando iniciativas de emprendemento para que os autónomos e pequenas empresas fomenten o desenvolvemento sostido da súa actividade económica, contribuíndo ao mantemento de empregos de calidade”, indicou a delegada territorial.
Nova convocatoria
Aneiros explicou que a través da nova orde de axudas da Consellería de Emprego, Comercio e Emigración dotada este ano dun orzamento de 6,7 M€, o Goberno galego financiará investimentos realizados polas entidades entre o 1 de xullo de 2025 ata a data de solicitude. Serán subvencionables as adquisicións de equipamento informático, mobiliario, melloras de eficiencia enerxética ou reforma e habilitación dos locais, entre outros gastos.
A intensidade das axudas variará en función do investimento realizado que será como mínimo de 5.000 €. En función dese investimento total, as axudas poderán ser do 55%, 50% ou 45% dese importe, con achegas que poden alcanzar os 35.000 euros.
Poderán beneficiarse desta convocatoria as persoas traballadoras autónomas, mutualistas e as pequenas e medianas empresas que se dean de alta ou inicien a súa actividade económica desde o 1 de xaneiro de 2024.