A directora xeral de Traballo Autónomo e Economía Social, Marta Mariño, participou na inauguración da 3ª edición da feira de emprendemento Impulsa Project 2025, organizada desde a Rede de polos de emprendemento e apoio ao emprego xunto coa compañía Neinver. Alí puxo en valor as citas coma esta —que hoxe e mañá alberga o centro comercial Coruña The Style Outlets— para visibilizar iniciativas emprendedoras ligadas ao territorio e que nacen do talento e o compromiso do feito a man. Tamén salientou o labor de asesoramento e acompañamento a este tipo de negocios por parte da Rede de polos da Xunta, que xa leva atendido arredor de 5.000 proxectos.
Durante estas dúas xornadas, cinco iniciativas emprendedoras da Rede de polos presentarán o seu traballo nun espazo con sete expositores, cinco deles dedicados aos proxectos participantes e dous á Xunta de Galicia e ao centro comercial. Os proxectos emprendedores participantes e que se caracterizan pola súa diversidade e creatividade son Belitroque, de mochilas e complementos elaborados con roupa reutilizada; Luzymoon Jewelry, de xoiería artesanal feita con resina e elementos naturais; Livengi, dedicado ás velas e artigos decorativos personalizados de elaboración artesanal; Bonicos Montessori, tenda especializada en xoguetes educativos e materiais pedagóxicos e Dalenda Jewels, xoias minimalistas elaboradas a man con arxila polimérica, resina e aceiro inoxidable.