O secretario xeral de Emprego e Relacións Laborais, Pablo Fernández, participou esta mañá na rolda de prensa de presentación do programa de actividades da 12ª edición da feira de emprendemento Pont-Up Store, apoiada pola Xunta e que se celebrará en Pontevedra desde o venres 19 ao sábado 20 de setembro.
Pablo Fernández destacou a traxectoria deste evento, consolidado xa como un referente no fomento do emprendemento en Galicia e como escaparate das numerosas iniciativas innovadoras que están xurdindo en toda a comunidade. Entre as novidades, salientou que a Xunta levará á feira por primeira vez O camiño do emprendemento musical, un proxecto dirixido a mozos e mozas interesados en desenvolver a súa carreira no sector musical como saída profesional. Así, o venres 16 profesionais de distintas disciplinas compartirán experiencias, talento e visión sobre como transformar a música e a creatividade en oportunidades de emprendemento, coa participación de artistas como Lola Bozzano e Muiños, e profesionais do sector musical como Quique Fernández, de Cega Audiovisuais, e José Patiño, do festival Wake Up. Ademais, no marco da vintena de actividades programadas, o Goberno galego, a través da Rede Eusumo, tamém organizará a actividade artística As cooperativas inspírannos, que consistirá na creación dun mural colectivo no interior da carpa do Pont-Up Store durante toda a xornada do venres e o sábado.