A directora xeral de Traballo Autónomo e Economía Social, Marta Mariño, participou esta mañá na mesa redonda sobre políticas territoriais de fomento da economía social do XI Coloquio Ibérico de economía social, organizado polas seccións portuguesa e española de CIRIEC (Centro Internacional de Investigación e Información sobre a Economía Pública, Social e Cooperativa). Alí, destacou o apoio da Xunta a esta fórmula económica solidaria pegada ao territorio, cun orzamento próximo aos 45 M€ este ano. Así mesmo, aludiu á colaboración transfronteiriza a través dos proxectos Laces —de fomento e consolidación da economía social na Eurorrexión Galicia–Norte de Portugal mediante a execución de programas pilotos para a competitividade e impulso de empresas de economía social— e Es-Factory —unha aceleradora para impulsar novas actividades emerxentes neste eido—.
No marco da Estratexia galega da economía social: horizonte 2027, a directora xeral tamén se referiu á nova Lei de cooperativas na que se está a avanzar e á Rede Eusumo, impulsada polo Goberno galego para fomentar e visibilizar este ecosistema. Con 115 entidades adheridas desde a súa creación en 2012, a Rede permitiu crear en Galicia 264 proxectos que xeraron máis de 540 empregos directos. A maiores, ten organizado máis de 2.000 actividades formativas e informativas ás que asistiron preto de 39.000 persoas, ademais de ter asesorado máis de 1.500 grupos promotores para o impulso de proxectos cooperativos, con máis de 3.000 persoas implicadas.