O secretario xeral de Emprego e Relacións Laborais, Pablo Fernández, participou hoxe na Coruña no evento a prol do liderado feminino Raíces & traxectorias, apoiado pola Xunta. No acto no que interviñeron oito mulleres referentes de distintos sectores, Fernández puxo de relevo o seu importante papel no tecido produtivo galego e a necesidade de garantir a igualdade de oportunidades no eido laboral. Nese senso, destacou que un 57 % das persoas que se achegan á Rede de polos de emprendemento e apoio ao emprego do Goberno galego son mulleres, no marco das máis de 6.100 iniciativas atendidas nos 15 centros repartidos por todo o territorio, o que sinala que se vai polo bo camiño.
O secretario xeral referiuse a outros proxectos da Consellería como a futura Estratexia galega de emprego feminino en sectores masculinizados para consolidar a igualdade entre homes e mulleres no mercado laboral, as axudas por 1,2 M€ destinadas a impulsar a presenza de mulleres en sectores tradicionalmente masculinizados no marco do programa Galicia Suma Talento: Emprégate, a iniciativa para concienciar ás novas xeracións da importancia de elixir profesión sen atender a prexuízos de xénero Que non te líen, ti elixes ou o campus formativo en igualdade laboral que supera as 9.000 persoas usuarias co gallo de avanzar na equidade real nas contornas de traballo.