A directora xeral de Traballo Autónomo e Economía Social, Marta Mariño, participou hoxe na xornada Soltando amarras organizada por Empresarias Galicia, onde apostou polo liderado feminino tanto nos postos directivos como no eido do emprendemento. Nese senso, recordou que un 57 % das persoas emprendedoras que se achegan á Rede de polos de emprendemento e apoio ao emprego son mulleres, no marco das iniciativas atendidas nos 15 centros repartidos por toda Galicia.
Mariño lembrou que esta Rede de polos se potenciará na futura Estratexia de emprendemento ligado ao territorio, co gallo de garantir a remuda xeracional ou a orientación dos negocios ás necesidades específicas das contornas nas que se asentan. Referiuse a outros proxectos da Consellería como a futura Estratexia galega de emprego feminino en sectores masculinizados para consolidar a igualdade entre homes e mulleres no mercado laboral, as axudas por 1,2 M€ destinadas a impulsar a presenza de mulleres en sectores tradicionalmente masculinizados no marco do programa Galicia Suma Talento: Emprégate ou a iniciativa para concienciar ás novas xeracións da importancia de elixir profesión sen atender a prexuízos de xénero Que non te líen, ti elixes.
