A Xunta recibe o recoñecemento de APE Galicia polo seu compromiso co impulso e fortalecemento do traballo autónomo

A secretaria xeral de Emprego e Relacións Laborais, Susana Pérez Iglesias, participou no XVI Congreso da entidade, coincidindo co seu vixésimo aniversario, e destacou a importancia da colaboración para dar resposta aos retos do colectivo

A secretaria xeral de Emprego e Relacións Laborais, Susana Pérez Iglesias, acompañada pola directora xeral de Traballo Autónomo e Economía Social, Marta Vázquez Guzmán, e polo director xeral de Comercio e Consumo, Gabriel Alén, participou onte no acto central do XVI Congreso de APE Galicia, que conmemora o vixésimo aniversario da organización. Durante o encontro, Pérez Iglesias recolleu, en nome da Consellería de Emprego, Comercio e Emigración, o galardón que distingue á Xunta polo seu compromiso e apoio ás persoas traballadoras autónomas.

A secretaria xeral agradeceu este recoñecemento e subliñou que impulsar o emprendemento por conta propia é clave para o Goberno galego, dado o seu papel esencial na dinamización económica e na creación de actividade, emprego e riqueza para o territorio.

Neste sentido, salientou o compromiso da Xunta co desenvolvemento e a consolidación dos negocios autónomos, tanto mediante distintos apoios como a través de recursos de acompañamento e asesoría ás persoas emprendedoras.

Pérez Iglesias puxo tamén en valor a contribución de APE Galicia á defensa dos intereses do sector e á interlocución coa Administración autonómica, unha colaboración que permite coñecer de primeira man os seus retos e avanzar na definición de medidas axustadas ás súas necesidades. Finalmente, destacou a importancia de celebracións como este congreso para recoñecer e visibilizar o papel das persoas autónomas na economía galega, así como a diversidade e o dinamismo dun colectivo fundamental para o desenvolvemento de Galicia.