A secretaria xeral de Emprego e Relacións Laborais, Susana Pérez Iglesias, participou esta mañá na inauguración da 9ª Feira de emprego 45+, promovida pola Cámara de Comercio da Coruña. Alí, referiuse ás medidas da Xunta orientadas a impulsar o emprendemento e a contratación de colectivos prioritarios co gallo de incrementar as oportunidades laborais das persoas con maiores dificultades para acceder a un traballo, como poden ser as maiores de 45 anos.
No referido ao emprendemento, a Rede de polos ten instalado un posto na feira para dar asesoramento gratuíto en calquera fase na que se atopen os proxectos presentados, nun contexto no que case a metade das máis de 7.200 iniciativas empresariais que leva atendido a Rede están lideradas por persoas maiores de 45 anos. Cómpre sinalar tamén iniciativas como o programa Galicia Suma Talento: Emprégate, enfocado a incentivar a inserción laboral da mocidade, das mulleres, das persoas paradas de longa duración, das emigrantes retornadas ou estranxeiras e das persoas con discapacidade ou en risco de exclusión social, así como das maiores de 52 anos.