O Consello aproba un decreto que habilita por primeira vez en Galicia un espazo oficial para certificar competencias profesionais de forma rápida e flexible
O presidente salienta que Galicia é a primeira comunidade en regular este tipo de formación para “adaptala ás necesidades reais do tecido empresarial”
As empresas, clústeres, asociacións ou colexios profesionais poderán deseñar, impartir, avaliar e mesmo emitir as microcredenciais segundo as súas necesidades dentro dun marco regulado pola Xunta, que garante a calidade destas certificacións
Polo tanto, esta ferramenta facilitará ao tecido produtivo reducir tempos de adaptación a postos de traballo ou novas tecnoloxías, mellorar procesos de promoción interna e acelerar a incorporación de talento
Tamén a través deste mesmo espazo, as persoas traballadoras poderán acreditar habilidades específicas e incorporalas ao seu currículo dixital, en coherencia co marco europeo de microcredenciais e reforzando a súa mobilidade profesional
O conselleiro de Emprego salienta a aposta da Xunta por promover “unha formación laboral continua e inclusiva”
O presidente da Xunta, Alfonso Rueda, informou hoxe de que o Consello aprobou o decreto que permitirá “que Galicia sexa pioneira en España na regulación das microcredenciais” no ámbito da formación para o emprego. O obxectivo é “adaptar a formación laboral ás necesidades reais do tecido empresarial” optando por unha oferta “breve, flexible e incluso á carta”.
A través deste decreto, Galicia contará por primeira vez cun sistema oficial que permitirá ás empresas crear formación curta, práctica e certificada segundo as súas necesidades reais, ao tempo que facilita ás persoas traballadoras acreditar competencias específicas de forma áxil e recoñecida, sen depender de itinerarios longos ou ríxidos. Este modelo compleméntase co resto da oferta formativa, alíñase coas recomendacións da UE e contribúe a mellorar a empregabilidade e reforzar a competitividade empresarial. “Queremos acompañar ao tecido empresarial atendendo as necesidades dun mercado laboral moi cambiante”, indicou o conselleiro de Emprego, Comercio e Emigración, José González.
Definición e obxectivo das microcredenciais
A nivel técnico, as microcredenciais son certificacións dixitais que acreditan coñecementos, competencias ou capacidades adquiridas a través de experiencias de aprendizaxe breves, prácticas e orientadas ao mercado. Inclúen sempre unha avaliación final e están deseñadas coa participación directa dos sectores produtivos.
Por exemplo, unha microcredencial pode acreditar que unha persoa domina un novo proceso dixital nunha empresa ou sabe empregar ferramentas de análise de datos. Ou un clúster pode identificar unha necesidade común e transformala nunha experiencia de aprendizaxe non formal, curta —de entre 10 e 100 horas de duración, tal e como establece o decreto—, práctica e con avaliación, cuxa superación dá lugar a unha certificación dixital verificable que a persoa poderá incorporar ao seu currículo. É dicir, “o traballador poderá certificar ese coñecemento cara outras empresas”, indicou o conselleiro, quen remarcou que este sistema afonda na aposta da Xunta por promover “a formación laboral continua e inclusiva”.
Un marco oficial con garantías
O decreto, que se publicará en vindeiros días no Diario Oficial de Galicia e entrará en vigor un mes despois, crea e regula —da man dos principais axentes do mercado laboral e cumprindo cun compromiso electoral— o Marco galego de microcredenciais para o traballo. Este establece as regras para deseñar, impartir, avaliar e certificar este tipo de formación curta, garantindo a súa calidade, utilidade e recoñecemento. A través deste marco, as microcredenciais contarán cun sistema público de calidade, verificación e rastrexabilidade, o que facilitará o seu recoñecemento oficial e reforzará a mobilidade profesional das persoas traballadoras.
A implantación será progresiva ao longo dos vindeiros meses, apoiada no despregamento do sistema de calidade —que garantirá o estándar común— e en novas ferramentas dixitais que permitirán consultar, verificar e compartir as microcredenciais de forma sinxela, con fitos como a conta persoal de formación, accesible en liña. Estes novos recursos estarán vencellados a EMi, cuxa aplicación estará dispoñible este mesmo ano.
Na práctica, as microcredenciais amparadas por este espazo terán unha duración curta, poderán impartirse de forma presencial, en liña ou mixta e incluirán sempre a avaliación final. Toda a información se publicará nun portal dixital común accesible para persoas e empresas, facilitando a inscrición e o seguimento das certificacións obtidas.
Formación á medida das empresas
Este novo marco permitirá que empresas, clústeres, asociacións profesionais ou colexios profesionais de calquera sector poidan, unha vez acreditados segundo o recollido no decreto, crear formación específica para as competencias que realmente necesitan, sen depender de catálogos pechados ou centralizados. As futuras microcredenciais homologadas facilitarán ás empresas reducir tempos de adaptación aos postos de traballo, procesos ou novas tecnoloxías; mellorar os procesos de selección e promoción interna e acelerar a incorporación de talento con competencias xa acreditadas.
Unha vía rápida para mellorar a empregabilidade
Para as persoas traballadoras —ocupadas ou desempregadas—, as microcredenciais supoñen unha vía rápida para actualizar competencias, adaptarse a cambios tecnolóxicos e mellorar as súas oportunidades laborais sen ter que cursar formacións longas. Ao tratarse de certificacións acumulables e compatibles, poderán incorporalas á súa conta formativa e presentalas ante as empresas como acreditación oficial de competencias específicas a través dun decreto co que Galicia dá un paso estratéxico e reforza a súa posición á vangarda da formación para o emprego baseada en competencias reais.
O conselleiro anunciou que unha vez aprobado este decreto, ao longo deste ano 2026, vaise levar a cabo “un proxecto piloto de microcredenciais en competencias dixitais especializadas”.