A delegada territorial de Ferrol, Martina Aneiros, visitou esta mañá en Narón a asesoría Servigami, unha das entidades beneficiadas coa ampliación do crédito orzamentario da que foi obxecto esta convocatoria da Consellería de Emprego, Comercio e Emigración
A orde elevouse ata os 33,7 M€ neste 2025 para beneficiar a integración laboral das persoas con discapacidade e daquelas en situación ou risco de exclusión social a través dos centros especiais de emprego e das empresas de inserción
A delegada territorial da Xunta en Ferrol, Martina Aneiros, visitou esta mañá a empresa Servicios Gallegos de Minusválidos SL, Servigami, en Narón, un dos centros especiais de emprego (CEE) da zona de Ferrolterra beneficiarios da ampliación de crédito da convocatoria das axudas da Consellería de Emprego, Comercio e Emigración a este tipo de entidades e ás empresas de inserción, dotada finalmente dun orzamento de 33,7 M€ e que deixa na área territorial 1,2 M€ en axudas a 13 centros especiais de emprego.
Durante a visita ás oficinas de Servigami, Aneiros tivo a ocasión de coñecer o funcionamento desta entidade con máis de 26 anos de experiencia na asesoría a diferentes empresas á hora de cubrir postos de traballo, centrándose especialmente na integración sociolaboral de persoas con discapacidade en sectores como a conserxería, limpeza, recepción ou servizos de control de accesos.
A entidade resultou beneficiada dunha achega autonómica de máis de 137.000 euros para o mantemento e adaptación dos 30 postos de traballo que posúe actualmente entre conserxes, administrativos e caixeiros.
A convocatoria de axudas para centros especiais de emprego e empresas de inserción, dotada inicialmente de máis de 27 M€ e que viu ampliado o seu orzamento en 5,2 millóns de euros o pasado mes de novembro, inclúe tres liñas de axuda no caso dos CEE: unha para o mantemento do custo salarial e dos empregos das persoas traballadoras con discapacidade dos centros (que recibirán importes equivalentes a entre o 50% e o 65% do Salario Mínimo Interprofesional), outra para financiar os custos salariais da contratación indefinida do persoal das unidades que prestan apoio a esas persoas con maiores obstáculos para atopar traballo e unha terceira para dar estabilidade a empregos mediante a contratación indefinida (máximo de sete postos por centro subvencionables) con incentivos de ata 25.000 euros por posto creado a xornada completa en función das características da persoa traballadora, así como para a adaptación de postos de traballo ás condicións das persoas cunha contía de 1.800 euros por cada un.
“Con esta orde o Goberno galego continúa avanzando na mellora da empregabilidade dos colectivos con maiores dificultades de acceso ao mercado laboral ao mesmo tempo que se reforza o papel das entidades de economía social e se recoñece o labor dos centros especiais de emprego e das empresas de inserción na creación de oportunidades reais para quen máis o precisa”, puntualizou Aneiros.