A directora xeral de Traballo Autónomo e Economía Social, Marta Mariño, participou hoxe na I Feira de emprendemento e apoio ao emprego organizada pola Universidade da Coruña e apoiada pola Xunta, intervindo na inauguración, realizando un percorrido polos distintos postos e tomando parte no acto de entrega de premios aos mellores traballos de fin de grao (TFG) e de mestrado (TFM) e teses de doutoramento en materia de emprendemento que tivo lugar no marco do evento. Xa pola tarde, participará nunha mesa redonda sobre alternativas ao financiamento tradicional para levar a cabo proxectos de emprendemento.
A directora xeral apelou á necesidade de seguir consolidando a colaboración do Goberno galego coas universidades co gallo de darlle un pulo ao emprendemento por parte das novas xeracións, ao tempo que destacou polo seu valor as iniciativas distinguidas hoxe, encadradas nas áreas de coñecemento de ciencias, artes e humanidades, ciencias da saúde, ciencias sociais e xurídicas e enxeñaría e arquitectura. Nesa liña, felicitou as persoas galardoadas polas súas ideas de negocio que —agardou— se fagan realidade en beneficio da economía galega.