A directora xeral de Traballo Autónomo e Economía Social, Marta Mariño, participou hoxe na apertura do acto organizado desde o Polo de emprendemento e apoio ao emprego de Friol arredor do queixo de Friol e do pan de Ousá co gallo de poñer en contacto tanto as produtoras e produtores como as persoas interesadas en iniciar proxectos vinculados ao medio rural e á transformación alimentaria de calidade. Alí, Mariño puxo de relevo a actividade do Polo friolés, que ten atendido preto de 300 iniciativas empresariais e promovido a creación dunhas 40 empresas.
No marco dos 15 Polos distribuídos por toda Galicia, por sectores predominan as actividades profesionais, científicas e técnicas (19 %), seguidas da hostalaría (13 %) e do comercio (12 %). Das persoas atendidas, o 58 % son mulleres e o 42 % homes e con elas lévanse realizado unhas 1.250 titorías. Ademais, este Polo leva celebrado preto dun cento de actividades entre reunións con entidades, accións de formación e eventos da rede.