O delegado territorial, Javier Arias, comprobou a marcha do último Plan Integrado de Emprego, que prevé desenvolver 18 actividades formativas e outras accións ata outubro deste ano
A Xunta de Galicia e a Asociación Provincial de Empresarios da Hostalería de Lugo (APEHL) colaboran nun novo Plan Integrado de Emprego que formará a 100 persoas desempregadas co fin de incorporalas ao sector.
O delegado territorial de Lugo, Javier Arias, visitou hoxe ao alumnado do curso para axudantes de camareiro que se imparte actualmente na sede da asociación no marco desta iniciativa, posta en marcha en outubro do pasado ano e que no prazo dun ano prevé completar 18 actividades formativas en Lugo e Monforte de Lemos.
Arias destacou que se trata dunha formación moi práctica e axustada aos requirimentos do mercado laboral, que inclúe cursos sobre cociña, servizo aos clientes, manipulación de alimentos, optimización de rutas de reparto ou ofimática.
Ademais, os participantes reciben orientación e asesoramento na busca de emprego, e coñecementos transversais en idiomas, competencias dixitais, prevención de riscos, relacións laborais, habilidades sociais e intelixencia emocional, entre outros aspectos.
O Goberno galego financia con 220.000 euros o programa, que se propón unha taxa mínima de inserción do 45% dos inscritos. Entre estes, o colectivo máis numeroso é o de persoas migrantes, e tamén son destinatarios preferentes as persoas con discapacidade, as que se atopan en risco de exclusión social, os menores de 30 anos ou as mulleres vítimas de violencia de xénero.
Arias explicou que a Consellería de Emprego, Comercio e Emigración financia outros dous plans integrados de emprego nos que participan doce concellos da provincia de Lugo, tamén cun orzamento de 220.000 euros en cada caso. O obxectivo, afirmou, “é mellorar as oportunidades laborais dos participantes cunha formación adaptada ás demandas reais do tecido produtivo local”.