A delegada da Xunta, Belén do Campo, acompañada polo alcalde da Laracha, José Manuel López e polo director territorial da Consellería de Emprego, Comercio e Emigración, Juan José Couce, visitaron aos alumnos do curso do Plan Integrado de Emprego (PIE) e do curso de Accións Formativas para Persoas Desempregados (AFD), centrado en Atención Sociosanitaria a Persoas Dependentes en Institucións Sociais, que se están impartindo neste Concello, cun apoio da Xunta de case 165.000 euros para o PIE e doutros case 47.000 euros para o curso AFD. Ademais, a representante do Goberno autonómico lembrou que este municipio recibiu tamén outros case 412.000 euros para UN obradoiro de emprego que tamén se está a impartir neste momento centrado en traballos de Carpintaría e Moble e Pintura Industrial en Construción.
Neste senso, a delegada puxo en valor o esforzo do alcalde da Laracha a súa aposta por ofrecer aos seus veciños unha formación que lles permita atopar un emprego co apoio da Xunta, xa que estes tres cursos supoñen un investimento total por parte do Goberno autonómico de case 625.000 euros para mellorar a formación de 135 desempregados. Belén do Campo aproveitou a súa intervención para animar a todos os participantes a “aproveitar esta gran oportunidade” e para felicitar ao alcalde polo traballo que están facendo neste eido.
PIE
Belén do Campo explicou que os PIE son iniciativa formativa que ten unha duración de 12 meses. Este programa permite o seguimento e formación dun grupo de 100 desempregados co fin de mellorar a súa empregabilidade. A Delegada da Xunta destacou o compromiso do alcalde de garantir, polo menos, un 40% de inserción laboral dos participantes.
Cabe destacar que esta iniciativa está dirixida a persoas desempregadas que teñen dificultades para inserirse no mercado laboral. Así, ao longo da duración do programa os participantes levan a cabo accións formativas destinadas a mellorar as súas aptitudes e facilitar o seu acceso ao mercado de traballo.
Durante todo o proceso formativo, o alumnado recibe asesoramento e orientación sobre aspectos prácticos como a motivación para buscar emprego, obradoiros de entrevistas, técnicas para potenciar as habilidades sociolaborais, elaboración de currículos ou inscrición en portais de emprego. Tamén hai accións enfocadas ao fomento da capacidade emprendedora e a prospección empresarial. Ademais, está prevista a realización de prácticas profesionais non laborais
Na comarca de Bergantiños-Costa da Morte o curso de PIE que se está a impartir é neste municipio e na provincia aprobáronse 18 cursos entre concellos e entidades por un importe de 3,7 millóns de euros.
AFD
Belén do Campo tamén aproveitou para visitar aos alumnos do curso de AFD enfocado á adquisición e mellora de competencias profesionais en Atención Sociosanitaria a Persoas Dependentes en Institucións Sociais. Este tipo de formación conta cun máximo de 15 alumnos e teñen unha duración de 4 meses. Neste senso lembrou que con estes cursos o Goberno galego continúa a reforzar a formación para o emprego co reto de axustar este programa aos perfís que demanda o tecido produtivo e de dar resposta así ás vacantes que existen no mercado laboral da zona na que se imparten. Por iso na convocatoria do ano pasado deuse prioridade ás especialidades máis demandadas polas empresas galegas e polas persoas traballadoras nas oficinas de emprego.
Na visita informou que na comarca de Bergantiños-Costa da Morte reciben estes apoios un total de 11 entidades e os concellos de Carballo e A Laracha para levar a cabo 48 cursos cun apoio da Xunta de máis de 2,8 millóns de euros. Na provincia están concedidos 396 cursos a concellos e entidades por un importe de máis de 20 millóns de euros.
A delegada destacou a importancia destes cursos que “permiten formar a persoas desempregadas en especialidades que contan cunha gran demanda de profesionais cualificados”. O éxito destas accións, segundo explicou Belén do Campo, pódese comprobar coa “altísima taxa de empregabilidade do alumnado que remata as formacións”.
Obradoiro de emprego
Este Concello tamén conta cun obradoiro de emprego no que 20 alumnas e os alumnos reciben unha formación de calidade, durante 9 meses, ao tempo que desenvolven un traballo produtivo de utilidade pública ou interese social, coa posibilidade de acreditalo a través dos certificados de profesionalidade. Este curso de formación está centrado en Carpintaría e Moble e Pintura Industrial en Construción. Na comarca de Bergantiños-Costa da Morte están aprobados dous obradoiros na Laracha e en Carballo-Coristanco por un importe que supera os 720.000 euros. Na provincia da Coruña conseguiron financiación 18 concellos para realizar obradoiros grazas a unha axuda de máis de 7,3 millóns de euros.