A Xunta de Galicia impulsará a partir do mes de marzo o proxecto O camiño do emprendemento musical, unha iniciativa orientada a introducir, instruír e mentorizar ás mozas e mozos galegos que estean a barallar a industria musical e de eventos como unha saída profesional. O programa, que compaxinará eventos presenciais e mentorías con artistas e profesionais do sector, arrincará este vindeiro luns 3 de marzo cun evento piloto na cidade da Coruña. Posteriormente seguirase desenvolvendo noutros puntos de Galicia.
O proxecto, organizado por Wake Up coa colaboración da Consellería de Emprego, Comercio e Emigración e a Consellería de Cultura, Lingua e Xuventude, enmárcase no compromiso estratéxico do Goberno autonómico con potenciar as oportunidades laborais da mocidade, ao tempo que promove o espírito emprendedor entre a comunidade máis nova para avanzar no impulso de proxectos innovadores que dinamicen o territorio e impacten na xeración de riqueza e emprego.
Evento piloto na Coruña
A primeira das citas previstas no marco deste programa celebrarase na Sala Pelícano da Coruña o próximo día 3 de marzo a partir das 19,00 horas. As inscricións para participar poderán facerse a través da web da rede de polos de emprendemento (https://polosemprendemento.gal/).
Nesta xornada está confirmada a presenza de cinco profesionais do sector, desde artistas ata promotores, técnicos de son e luces ou persoal de comunicación e prensa. Así, participarán Sara de Araujo —dj Internacional e creadora do programa Hola DJ, — Manu Sánchez —dj promotor e fundador de Danzú e Origen Festival Mallorca—, Ramón Fernández —enxeñeiro de son, dono da empresa Area 51 e socio de proxectos como FMS España e WOW FC—, e José Patiño —fundador de Wake Up, Orballo Cultural, Khione e Vibewear—.
A xornada estará dividida en dous apartados. O primeiro deles consistirá nunha charla-coloquio, na que se abordará como iniciarse na industria musical e outros aspectos relacionados coas principais barreiras, a situación actual da industria e as posibilidades profesionais que existen actualmente.
Na segunda parte, asignarase aos participantes, en función do seu interese profesional, un mentor para ter unha experiencia máis específica e persoal. Ademais, unha vez rematada a charla, poderán optar a recibir mentorías adicionais por parte do equipo para seguir afondando no acompañamento dos seus proxectos.