A XUNTA FORMA EN LIDERADO FEMININO E APOSTA POLA MELLORA PROFESIONAL DAS MULLERES GALEGAS A TRAVÉS DO PROGRAMA IMPULSA
A XUNTA FORMA EN LIDERADO FEMININO E APOSTA POLA MELLORA PROFESIONAL DAS MULLERES GALEGAS A TRAVÉS DO PROGRAMA IMPULSA
- Trátase dunha actividade de cualificación da Consellería de Promoción do Emprego e Igualdade que terá lugar de xeito virtual entre o 27 de marzo e o 12 de maio cun total de 100 prazas
- As inscricións xa se poden formalizar con data límite ata o 20 de marzo
Santiago de Compostela, 10 de marzo de 2023.- A Consellería de Promoción do Emprego e Igualdade abriu o prazo de inscrición no programa formativo de empoderamento e liderado feminino Impulsa. As mulleres interesadas en participar na actividade, que se desenvolverá de xeito virtual entre o 27 de marzo e o 12 de maio, poden inscribirse xa, ata o 20 de marzo, a través da páxina web https://fungatra.gal/.
A formación que se impartirá, dirixida a 100 mulleres, estará conformada por obradoiros, masterclass e sesións de networking e coaching individuais para apoiar a aquelas mulleres cunha cualificación media que teñan ganas de crecer, xerar cambios e empoderarse para seguir mellorando profesional e persoalmente.
Por medio desta iniciativa, a Xunta persegue incorporar ás participantes ao proceso de cambio e aprendizaxe en áreas persoais e profesionais, e brindarlles recursos e ferramentas para o seu crecemento profesional e persoal. A formación será impartida por Eliana Oliveros, especializada en procesos de cambio, xestión do talento, comunicación, liderado e transformación de equipos cunha traxectoria profesional de máis de 15 anos acompañando e formando a directivos, empresarios e comerciais de empresas nacionais e internacionais.
A organización distribuirá ás 100 participantes en grupos de 25 persoas para traballar de forma personalizada as dinámicas, actividades e tarefas.
Entre todas as asistentes ao programa sortearanse catro sesións individuais de coaching para o que será requisito indispensable ter asistido a todas as actividades do programa: obradoiros, masterclass e networkings.